O Concello do Barbanza, ante a previsión meteorolóxica adversa para este domingo, con avisos para o litoral suroeste da provincia da Coruña de refachos de máis de 100 km/h entre as 15:00 e as 18:00 horas e chuvias de máis de 80 l/m2 nun período 12 horas entre as 6:00 e as 24:00 h, tomaron unha serie de decisións relevantes para protexer á poboación dos efectos da borrasca Herminia.
Na Pobra o Concello emitiu unha serie de disposicións concretas para minimizar a nivel local “o elevado risco de accidentes que poñan en perigo a integridade das persoas provocados por estas condicións meteorolóxicas. Deste xeito, o Goberno da Pobra tomou as seguintes medidas para garantir a seguridade:
1 Suspender todas as actividades deportivas ao aire libre, tanto de deporte federado como afeccionado, que poidan desenvolverse nas instalacións deportivas de titularidade municipal: pistas deportivas públicas, estadio da Alta, campo de fútbol de Cadreche ou calquera outra de índole semellante. Esta medida terá efecto dende as 12:00 do sábado ata as 24:00 horas do domingo 26 de xaneiro.
2 Prohibir o uso de todos os paseos de titularidade municipal: paseo da Illa, da Lombiña, da Alta, do Xobre, das Xunqueiras, dos Areos e outros de situación similar, con efectos dende as 14:00 ata as 19:00 horas do domingo 26 de xaneiro.
3 Prohibir o uso de todos os parques infantís de titularidade municipal con efectos dende as 14:00 ata as 19:00 horas do domingo 26 de xaneiro.
4 O incumprimento destas medidas por parte de calquera persoa será baixo a súa total responsabilidade e poderá ser sancionada pola Policía Local no exercicio das súas funcións.
En Muros, ante os avisos de nivel vermello da Axencia Estatal de Meteoroloxía (AEMET) e a Dirección Xeral de Emerxencias da Xunta, que prevén chuvias moi intensas, ondas no mar de ata 10 metros e refachos de vento de ata 100 kms/h, o Concello suspendeu as actividades deportivas federadas ao aire libre e recomenda “moita precaución, evitando os desprazamentos innecesarios tanto a pé como por estrada”.
Semellantes disposicións foron tomadas polo Concello de Porto do Son, polo de Outes, polo de Noia, polo de Ribeira e polo de Boiro.
No caso de Rianxo, informouse de dende a primeira hora da mañá estarán pechadas todas as instalacións deportivas ao aire libre, suspendéndose toda a actividade prevista nelas, así como o paseo marítimo e zonas verdes próximas ao litoral. Ademais, `persoal do Servizo de Obras do Concello de Rianxo estará de garda toda a xornada para actuar ante calquera incidencia que se poida producir. Tamén estarán de garda voluntarios de Protección Civil Rianxo dende esta noite. Ante calquera problema recoméndase chamar ao 112, ao 981 86 06 25 ou ao 609 86 22 22.
