O sancribense (natural de Cervo, Lugo) Antonio Basanta López, en tanto que integrante do equipo do Comisario de Océanos e Pesca da Unión Europea, debe repasar con detemento as funcións por el desenvolvidas na súa recentísima etapa como director xeral de Pesca, Acuicultura e Inmersión Tecnolóxica da Consellería do Mar da Xunta de Galicia. E facelo, sobre todo, no que garda relación coa visión global do mercado da pesca, no que é un verdadeiro especialista ou experto.
Vai algo máis de dous meses, Antonio Basanta quixo por no disparadoiro á estrutura da UE ao convidar a esta a comezar unha nova etapa e modificar o rumbo nas, dixo el, “duras políticas” que xeraron un rexeitamento unánime no sector e nas distintas administracións (é de supoñer que tamén na galega).
Engadiu o daquela director xeral de Pesca do goberno galego que había que garantir unha actividade pesqueira “con futuro e sostible” tanto dende “un punto de vista ambiental como económico e social” ao coidar necesario que os Estados “sexan conscientes e non neguen o papel que lles corresponde ao sector marítimo-pesqueiro e ao conxunto da cadea mar-industria”.
O que daquela era futuro, é neste intre o máis actual presente, un presente que Antonjo Basanta debe desenvolver un papel determinante na pesca comunitaria, nomeadamente a española e, en particular, a galega.
Non é Antonio Basanta o primeiro galego con responsabilidades na pesca europea. Responsabilidades que foron ou puideron ser decisivas para un sector fundamental na economía-social da súa terra. Mais parecera que lles queimase abordar decididamente estas cuestións que, en teoría, coñecían perfectamente e que, sen embargo, non souberon facelo ou non foron quen de arrimar á súa sardiña, que é a nosa e que era o que cumpría dada a importancia internacional deste sector.
Garantir unha actividade pesqueira con futuro e sostible era, no ideario de Basanta Lopez, posible. Agora, como director xeral de Pesca, como galego involucrado nos intereses marítimo-pesqueiros de Europa debería predicar co exemplo. Acaso non é Galicia a rexión pesqueira máis importante da UE?
Talvez non hai argumentos ou é que estes só existen cando se está na oposición?.
