Sucédese o acoso escolar nalgún centro educativo da comarca do Barbanza. Os centros educativos terían que aplicar os protocolos, informando as familias e sendo a súa prioridade principal a protección das vítimas. Se persistise o acoso debería actuar a inspección educativa da Xunta de Galicia e ter unha maior implicación desde as asociacións de nais e pais de alumnos.
Unha familia tivo que abandonar a comarca porque non atopaba unha solución nin poñía freo ao “acoso escolar” sufrido pola súa filla de 8 anos de idade. A nena sufría golpes e agresións constantes, por parte de catro dos seus compañeiros, sen que desde o centro escolar nin a Xunta de Galicia lles chegase unha alternativa. Por saúde física e mental, tanto da súa filla como da nai, decidiron poñer quilómetros de distancia e marcharse fóra de Galicia.
A desesperación e a angustia dunha nai, polas humillacións sufridas e os malos tratos cara á súa filla, menor de idade, non tería que suceder na actualidade. Os protocolos e as accións en materia de acoso escolar ou bullying terían que funcionar, desde o primeiro momento para non causar danos físicos nin morais aos menores. Non pode ser que os “delincuentes ou acosadores” sigan no colexio e os alumnos “acosados e vítimas” teñan que quedarse na casa, durante un tempo, mentres non se adoptan as medidas correspondentes.
Hai que ter moita empatía cos proxenitores dos fillos que padecen acoso escolar. Os responsables dos centros educativos e desde a inspección educativa da Xunta de Galicia teñen que ser un pouco máis exquisitos no trato cara aos pais porque necesitan unha atención adecuada e sempre respectuosa. Non son inimigos, son colaboradores necesarios para que haxa un ambiente de paz e tranquilidade nos centros educativos, libres de violencia.
