A Dirección Xeral de Desenvolvemento Pesqueiro da Consellería do Mar da Xunta de Galicia organizou este martes, 17 de decembro, a xornada As Estratexias de Desenvolvemento Local Participativo promotoras da Economía Azul. O proxecto Bitácora (Medidas para a posta en valor do patrimonio pesqueiro e fortalecemento da identidade da ría de Arousa), posto en marcha pola asociación da nosa comarca Amicos co apoio do GALP Ría de Arousa, foi un dos seleccionados como proxecto inspirador de economía azul.
A xornada apoiouse en dúas mesas redondas. Unha primeira baixo o título Os GALP motores da economía azul, na que os e as xerentes dos GALP A Mariña-Ortegal, Golfo Ártabro Norte, Costa da Morte e Costa Sostible expuxeron o traballo que se desenvolve dende estes grupos de acción local no sector pesqueiro.
A continuación celebrouse o grupo de debate Proxectos inspiradores no marco da economía azul nos territorios GALP, no que interviron representantes de catro proxectos innovadores impulsados co apoio dos GALP Golfo Ártabro Sur, da Ría de Arousa, da Ría de Pontevedra e da Ría de Vigo-A Guarda. Neste participaron o director xeral de Amicos, Xoán España, e a participante dos programas de emprego e activista medioambiental de Amicos, Cristina Sanmiguel. Eles foron os encargados de presentar ante os/as asistentes o proxecto Bitácora, os seus obxectivos, desenvolvemento e fitos acadados.
Durante o relatorio fíxose un percorrido por tódalas accións realizadas no marco da iniciativa, que estiveron impulsadas por persoas con discapacidade intelectual especializadas no sector, encargadas de conducir as accións de sensibilización e divulgación referentes ao patrimonio cultural e ambiental vinculado ao sectores marisqueiro e pesqueiro da zona.
No marco do proxecto elaborouse tamén un documental sobre o patrimonio pesqueiro e ambiental da ría de Arousa. Nel recolléronse distintas conversas con profesionais dos sectores pesqueiro e marisqueiro sobre a situación da ría, as dificultades ás que se enfronta e posibles solucións.
O proxecto Bitácora
Bitácora comezou na segunda metade de 2023 co obxectivo de valorizar os sectores ligados ao ecosistema mariño das comarcas do Barbanza e Arousa. A iniciativa incluíu máis de dez xornadas de sensibilización con escolares, limpezas de residuos mariños con alumnado e profesionais do sector, así como sesións de reutilización creativa de refugallos.
Entre as actividades desenvolvidas, destacan as visitas ás lonxas de Aguiño e Cabo de Cruz, así como obradoiros e formacións específicas. Bitácora promoveu a divulgación e sensibilización en centros educativos sobre o patrimonio cultural e ambiental vinculado ao sector pesqueiro, ademais de accións de valorización dos produtos da comarca.
O proxecto foi financiado polo GALP Ría de Arousa, coa colaboración da Consellería do Mar e o Fondo Europeo Marítimo de Pesca e Acuicultura (FEMPA).
