O Concello de Boiro desenvolve unha actividade de detección temperá da dislexia e o trastorno por déficit de atención/hiperactividade (TDA/H) no contexto escolar. O alcalde, José Ramón Romero, e a concelleira de Educación, Carmen Silva, participaron este venres 8 de novembro na presentación do programa coa súa coordinadora, Rosa Rivas, e o seu equipo. Este programa forma parte do Proxecto EnClave 2024/2025 que desenvolve o Concello de Boiro en todos os centros de ensino do municipio e vaino desenvolver o grupo de investigación da Facultade de Psicoloxía da USC Aspectos Evolutivos e Intervención Piscoeducativa AEIPSE que traballa na avaliación e intervención de trastornos do neurodesenvolvemento.
A iniciativa vaise levar a cabo nos cursos de 1º, 2º e 3º de Primaria co obxectivo de realizar un cribado para a detección temperá da dislexia ou TDA/H.
“Dende o Concello estamos moi contentos de poder desenvolver este programa por primeira vez no Proxecto EnClave e facelo de man da Universidade de Santiago de Compostela, unha iniciativa que nos vai permitir ter un diagnóstico precoz e traballalo nas aulas”, recoñeceu a concelleira Carmen Silva.
O programa vai constar de dúas fases, unha primeira de cribado e, dos resultados deste primeiro cribado, unhas probas máis específicas para a detección e posíbel diagnóstico.
“Este programa busca detectar os casos susceptíbeis de dislexia ou TDA/H co obxectivo de identificar as necesidades dos nenos e nenas para que poidan ser tratadas polos profesores e as familias”, afirmou Rosa Rivas.
O equipo está constituído polos profesores doutores Santiago López Gómez, Patricia Iglesias Souto, Eva Taboada Ares, e a coordinadora, Rosa Rivas e os investigadores Tomás Mañas León, Anderson de Jesús e Lourdes Vellón Nogueira. Na presentación do programa participaron tamén os directores e directoras dos centros de ensino do municipio.
O alcalde, José Ramón Romero, agradeceu a implicación de todos os axentes implicados neste proxecto: “Esta acción que se vai levar a cabo coa colaboración do Concello de Boiro, a Facultade de Psicoloxía e os centros educativos vai redundar na mellora do rendemento académico dos nosos nenos e nenas ao ofrecer un diagnóstico e unhas ferramentas de traballo coa nosa rapazada dende idades moi temperás”.
O Concello de Boiro destina 60.000 euros anuais para implementar o Proxecto EnClave, un programa innovador que busca atallar as principais problemáticas que se detectan nos centros de ensino e ten como finalidade a redución significativa dos casos de acoso escolar, unha maior conciencia e sensibilización sobre a importancia da saúde mental e conseguir un alumnado máis apoderado emocionalmente, capaz de xestionar as súas emocións e resolver conflitos de maneira pacífica.
