A Xunta fixo saber este luns 11 de novembro que Noia e a súa contorna disporán este ano dun plan local de saúde que “adaptará o modelo de atención primaria ás necesidades específicas da poboación dos municipios de Noia, Lousame, Outes e Porto do Son”.
Ademais do servizo de atención primaria de Noia, os servizos que contarán con novos plans de saúde locais antes de finalizar 2024 son os de Cambre, Culleredo, A Laracha, Oleiros, Vite (Santiago de Compostela), Boiro, Bertamiráns (Ames), Chantada, Guitiriz, Outeiro de Rei, San Roque (Lugo), A Carballeira (Ourense), Trives, Coles, Poio, Terra de Montes, Sanxenxo, Vilaboa-Arcade, Ponte Caldelas-A Lama, Matamá (Vigo), López Mora (Vigo), Coruxo (Vigo) e Moaña. Agárdase que no ano 2026 estes plans estean completamente implantados en todos os servizos de atención primaria.
Coa posta en marcha destes plans a Xunta quere poñer a atención primaria como eixe vertebrador da asistencia sanitaria e a cidadanía como protagonista principal sobre a que deben xirar as políticas sanitarias.
Con esta ferramenta de xestión o Goberno galego tamén “busca incidir na prevención da enfermidade, acadar a curación ou paliar as doenzas e os problemas de saúde da poboación, sempre tendo en conta as súas necesidades e a contorna onde desenvolve o seu proxecto vital”.
