O vindeiro 13 de outubro toca poñerse as botas de camiñar en solidariedade coas crianzas prematuras e as súas familias. Este é o cometido da V Andaina Solidaria a favor de AGRAPREM (Asociación Galega de Familias de Nenos Prematuros), organizada pola Asociación de Amas de Casa de Ribeira na que colabora o concello de Ribeira así como un bo número de patrocinadores locais. Os detalles da iniciativa foron compartidos polo concelleiro de Deportes Xabier Vidal, a presidenta das Amas de Casa de Ribeira, Puri Cores, Sofía Cores da directiva das Amas de Casa e o técnico de Deportes do concello Fran Romay.
A saída da andaina será a explanada do porto preto da Oficina de Turismo o vindeiro 13 de outubro a partir das 10.30 h, as inscricións poderanse facer ao Whatsapp 653 33 31 24, ao correo amasdecasaderiveira@gmail.com ou in situ cun prezo libre ou á vontade.
Cores agradeceu ao Concello pola colaboración igual que aos patrocinadores; tamén aproveitou para facer un chamamento ás administracións “porque as terapias destes nenos e nenas son dun custe moi elevado para as familias que o sofren” e animou a toda a veciñanza de Ribeira que acuda pola “importancia que ten esta cuestión”.
Vidal contextualizou o obxectivo da andaina: “Esta iniciativa quere dar visibilidade a esta asociación que lles aporta axuda ás familias con nenos e nenas prematuros; que en moitos casos teñen dificultades cas necesidades que requiren. Sen a axuda da de dita asociación, non poderían afrontar os gastos e inconvenientes que poden requirir os rapaces e rapazas prematuros”.
Fran Romay explicou o percorrido que tamén esta deseñado para a rapazada, e dixo que o itinerario discorrerá pola beiramar do paseo de Coroso e xirando á esquerda polo novo paseo ao carón da Escola Náutico-Pesqueira seguindo ata o aparcadoiro de Coroso onde haberá un pequena parada para logo seguir de volta ata o Malecón”, e para rematar Romay tamén animou á toda a veciñanza para camiñar en prol da sensibilización e concienciación dos nenos e nenas prematuros.
