Nin a ameaza de chuvia nin calquera outro factor desanimou a marea vermella da IV Andaina Solidaria JEALSA – SD. Barbantia, celebrada este domingo 29 de setembro, con saída dende a praza de Galicia de Boiro e coa participación de máis dun milleiro de participantes, cifra que superou a do ano pasado, onde se andou preto dos 1.000 camiñantes (e ciclistas) solidarios.
O recadado na andaina (cinco euros por persoa participante: non só quen se enfundou a camiseta vermella e percorreu o itinerario trazado, senón tamén quen quixo colaborar no plano económico a través do dorsal 0), auspiciada pola conserveira local JEALSA e a Sociedade Deportiva Barbantia, irá dar á oficina compostelá da organización Stop Leucemia (para investigar na loita contra esta doenza poñendo o foco nos novos avances tecnolóxicos). O percorrido, accesíbel e doado de camiñar, foi de dez quilómetros.
Na cita tamén se implicou a comunidade da asociación local Amicos, entidade inclusiva do Barbanza, que cualificou a andaina a prol de Stop Leucemia de “exemplo do que podemos lograr unidos por unha causa común”.
