A Asociación para a Defensa Ecolóxica de Galicia (ADEGA) xuntou nesta pasada fin de semana preto de 800 persoas voluntarias para limpar os areais galegos. Máis de 50 entidades de toda Galiza participaron na XIII Limpeza Simultánea de Praias coordinada cada ano pola asociación.
ADEGA fixo saber que “a pesar da meteoroloxía desfavorábel, que provocou que varias limpezas se adiaran, contáronse por centos as persoas voluntarias que sumaron os seus esforzos ao longo do litoral galego para limpar as praias e denunciar a problemática ambiental do lixo mariño”.
A organización ecoloxista ADEGA calcula que se retirou máis dunha tonelada de lixo nesta 12ª edición da Limpeza Simultánea de Praias. Na actividade participaron centros de ensino, asociacións, escolas de surf, colectivos e particulares de todo o territorio galego que traballaron de xeito organizado en 29 concellos da costa.
Caracterización do lixo retirado
De entre o lixo retirado, tiveron moita presenza as cabichas, os paus dos ouvido, as toalliñas e produtos de hixiene e, como vén sendo habitual, restos plásticos. Ademais, adoitan aparecer residuos menos convencionais como calzado, traxes de baño, tubos, colchóns, rodas, portas… Neste ano, ADEGA fixo un esforzo especial por identificar a presenza de biosoportes, materias utilizados nas plantas depuradoras na fase da eliminación de materia orgánica, que cada vez aparecen máis na costa galega e que preocupan ás organizacións ecoloxistas.
Con este tipo de accións, ADEGA pretende poñer o foco sobre a problemática dos residuos nos nosos areais despois da tempada turística, así como na importancia de conservar a nosas praias libres de lixo para evitar que este acabe no mar. Ademais, ADEGA incide en que as limpezas de praias non deben de ser feitos illados, e convida a calquera persoa a recoller o lixo do noso litoral sempre que poida e de xeito manual, con respecto polos ecosistemas dunares e con especial coidado coa fauna e flora que neles habita.
ADEGA agradece enormemente a participación de todas as persoas que colaboraron a xornada e participaron como voluntarias en todas as limpezas.
Concellos colaboradores
Esta actividade está financiada polos concellos de Ares, Cangas, Carballo, Muros, Nigrán e O Grove.
