O Concello de Boiro programa unha nova edición do ciclo de actividades Muller e Saúde, unha proposta que busca promover o benestar físico, mental e emocional da muller. As actividades desenvolverase durante o mes de novembro e requiren inscrición previa.
A primeira das propostas que se vai levar a cabo é unha sesión sobre Alimentación antinflamatoria, impartida por Iván Parada Barral, dietista da Consellería de Sanidade. Esta sesión terá lugar o 15 de novembro de 17.00 a 20.00h
O 29 de novembro, no mesmo horario, está programada unha charla sobre os Beneficios do adestramento de forza para a prevención de enfermidades. Esta sesión estará impartida por Orlando Blanco Iglesias, técnico do Servizo de Estilos de Vida Saudábeis da Consellería de Sanidade.
Este programa ten como obxectivo promover un estilo de vida saudábel en todas as etapas da vida. Un proxecto que foi deseñado dende a área de Política Social co apoio da Escola Galega de Saúde para Cidadáns que se encarga de impartir as actividades.
O programa abarca áreas como son a xinecoloxía, a saúde mental, nutrición, actividade física e benestar emocional; ofrecendo ferramentas e recursos para previr doenzas e mellorar a calidade de vida da muller.
Todas as actividades son gratuítas pero requiren inscrición previa no enderezo electrónico cim@boiro.org ou no teléfono 981 84 48 00 ext. 1285.
