O conselleiro de Sanidade, Antonio Gómez Caamaño, supervisou hoxe o remate das obras de ampliación e mellora da base da ambulancia medicalizada do Salnés, que volveu xa operar desde Vilagarcía de Arousa.
Na visita tamén participaron o delegado territorial da Xunta en Pontevedra, Agustín Reguera, o xerente do Servizo Galego de Saúde, José Ramón Parada, o xerente da área sanitaria de Pontevedra e O Salnés, José Flores, e o director da Fundación Pública Urxencias Sanitarias de Galicia-061, Román Gómez.
O conselleiro de Sanidade destacou que a Xunta está a cumprir o seu compromiso de poñer en servizo as instalacións reformadas do 061 no Salnés a comezos de setembro, co regreso, tamén, da ambulancia medicalizada desprazada a Sanxenxo.
Antonio Gómez Caamaño sinalou que grazas a este investimento de 155.000 euros, os médicos, enfermeiros e técnicos sanitarios do 061 do Salnés dispoñen dunhas mellores instalacións, cunha estancia que independiza do resto de zonas de traballo os desprazamentos desde o hospital ao mortuorio, catro dormitorios, unha sala de reunións, vestiarios diferenciados por sexo e un almacén.
O conselleiro aproveitou a visita para poñer en valor o labor fundamental do 061 e dos seus profesionais, que realizan un servizo público esencial, garantindo o acceso á asistencia sanitaria as 24 horas do día e os 365 días do ano.
Primeira obra dun plan integral de reformas
As obras de mellora da base do 061 no Salnés son as primeiras finalizadas dentro do plan da Xunta de reforma, modernización, accesibilidade, adaptación e adecuación das bases e das infraestruturas da Fundación Pública Urxencias Sanitarias de Galicia-061. Este plan previsto para o período 2024-2026 suporá un investimento estimado de máis de dous millóns de euros.
Así, o Goberno galego levará a cabo melloras nas bases medicalizadas e de enfermería das que dispón o 061 en Galicia. En concreto, actuarase nas bases das localidades da Coruña (dúas bases), Santiago de Compostela, Ferrol, Lugo, Monforte de Lemos, Foz, Ourense (dúas bases), Pontevedra, Vilagarcía de Arousa, Vigo e Mos. O proxecto tamén inclúe melloras nas instalacións da central de coordinación, situada na Estrada.
Na actualidade a rede de transporte sanitario urxente do 061 está formada por 16 ambulancias de soporte vital avanzado, 107 de soporte vital básico, 2 ambulancias convencionais e 2 helicópteros medicalizados.
