No pleno do pasado 2 de setembro o Goberno municipal de Outes deu conta da aprobación da liquidación do Orzamento de 2023 onde se recollía o remanente de tesourería para gastos xerais do Concello de Outes a 31 de decembro de 2023, que ascendía a 1.485.738,95 €. O Goberno compartiu nunha táboa o emprego uso dos remanentes de tesourería dende 2019, todos eles aprobados en pleno.
A 31 de decembro de 2019 o sobrante de tesourería para gastos xerais era de 4.433.080,51 €. Dende o Executivo local explicaron que a suspensión das regras fiscais en 2020 por parte do Goberno central facilitou o uso dos remanentes polos concellos.
En 2023, as contías sobrantes foron destinadas para a rehabilitación de pozos de rexistro na rede de saneamento (uns 48.000 euros), para a ampliación do saneamento con vistas a conectar a futura EDAR de Ousesende (48.400 euros), para a ampliación e renovación do céspede artificial do Campo de Fútbol do Conchido (136.000 euros), para o pavimentado do acceso a Rates polo Cabalo (6.300 euros), para a conexión do saneamento en Outes (8.150 euros), para mellorar o acceso a Agrocarou en Santo Ourente (10.500 euros), para a ampliación da Escola Infantil de Santo Ourente e proxecto técnico (103.761, 66 euros) e para gasto corrente (facturas de luz, combustíbel e outros provedores: un total de 411.357 euros). Boa parte destas actuacións de 2023 están pendentes de execución, segundo sinalou o Concello.
O total da contía empregada até o de agora é de 3.001.849 euros.
