Quen pense que con agosto remata o verán e, tamén, as súas celebracións, os concellos do Barbanza ofrécenlle unha chea de argumentos en contra. Por exemplo o Concello de Porto do Son, que como vén sendo tradición conmemora as súas celebracións estivais máis relevantes (as Festas do Carme) no primeiro treito do mes de setembro, desta volta entre o 7 e o 11 de setembro.
Por certo que a Área de Cultura do Concello vén de compartir nas redes a axenda de celebracións, unha completa programación que inclúe propostas e actividades para residentes e visitantes de todas as idades e con todo tipo de gustos e tendencias.
A persoa encargada de dar o pregón, o sábado 7 ás 13.30 horas na praza de España, será o médico, profesor e escritor muradán Juan Gestal.
A axenda inclúe dezasete bandas convidadas: a agrupación local Canlebó de Camboño, o Grupo Assia, a orquestra La Ocaband, a Banda de Música de Noia, a Xurxo Fernandes, Claxxon, New York Orquestra, a Banda de Música de Caamaño, Paco de Leña, os noieses Monoulious DOP, Orquesta Finisterre, Chocolate Disco Móvil & Radio, a orquestra París de Noia (oficial), La Banda de Ayer, a orquestra Kubo, a orquestra Marbella e a Charanga Os Celtas (que protagonizará a traca final das celebracións, o mércores 11, logo dos fogos de artificio da medianoite).
