Cada vez son máis os maiores que viven sós. Cada vez son máis os maiores recluídos en centros da terceira idade. Cada vez máis a sociedade galega pisa os carreiros trillados dende vai anos por aqueles que “inventaron” que os maiores -por non dicir os vellos- significan un “enorme peso” para eles unha vez que -ela ou el- perden a súa parella.
Setecentos mil galegos (un de cada catro cidadáns desta comunidade autónoma) somos maiores de 65 anos, o que significa que estamos (ou deberiamos estar) xubilados. Pero en Galicia só o 2,84% destes teoricamente “xubilados”teñen a posibilidade de seren atendidos nunha residencia das poucas existentes no país. E só o 14% das prazas de acollida existentes son públicas.
Galicia dispón, se os datos oficiais son correctos, de 341 residencias, con prezos que oscilan entre os 1.610 euros mensuais e os 2.386, segundo consta na información consultada; en Ourense, 1.610 euros; en Lugo, 1.685: en Oleiros (A Coruña) entre 1.988 e 2.258 euros; na Coruña, de 1.900 a 2.220 euros (na zona residencial da Zapateira, ata 2.386 euros ao mes); e en Pontevedra e Vigo, dende os 1.800 ata os 2.350 euros.
Son estes, como pode comprobarse, prezos que un xubilado non pode permitirse pagar e que obrigan a recorrer a unha axuda económica familiar que non sempre se pode prestar, ou a vivir só alí onde residía anteriormente coa súa parella, sexa en alugueiro ou asumindo os gastos que xera a vivenda propia (luz, auga, gas, cargas municipais, alimentación e, no seu caso, pagar a quen faga a limpeza da casa, da roupa de cada quen e/ou a comida).
Son datos que, en xeral, non vai moito barallaba o Partido dos Socialistas de Galicia a través dunha intervención realizada no Parlamento de Galicia pola deputada Paloma Castro, quen acusou á Xunta de “priorizar” as residencias de maiores privadas cando Galicia é a cuarta comunidade autónoma con menos prazas do Estado.
Nun escrito feito público, a deputada socialista denunciou que o goberno galego non presentou o seu modelo de atención aos maiores e advertía que o desleixo da Xunta ao renunciar a construir unha residencia en cada unha das grades cidades galegas é debido a que a Consellería de Política Social “está máis preocupada por protexer o negocio dunha empresa privada que de prestar un servizo público de calidade á cidadanía galega”.
Das 341 residencias existentes en Galicia, 29 están nalgunhas das maiores cidades da provincia coruñesa: 20 na Coruña, capital; 4 en Oleiros, 3 en Narón e 2 en Carballo.
Talvez estes datos non o expliquen totalmente, pero poden encamiñar ao lector cara unha explicación do motivo polo que en Galicia, tantos maiores viven sós.
