O Mago Teto estará este venres 9 de agosto no Campo de Arriba de Rianxo, ás 21.00 horas, para ofrecer a veciños e visitantes o seu espectáculo familiar Rock and Magic, proposta incluída na programación de Cultura no Camiño da Xunta de Galicia.
Rock ‘n’ Magic, dirixido por Fran Rei, é mais que un espectáculo de maxia; é un concerto de rock and roll. Segundo se explica na axenda do programa de Cultura no Camiño, “o Mago Teto é un dos mellores e máis populares magos do noso país e nesta proposta une o seu talento ao de Fer Risco na batería e Mon Orencio na guitarra, para construír un espectáculo onde a maxia convive con algúns dos clásicos do rock and roll”.
Aparicións sorprendentes, xogos de adiviñación e pequenas e grandes ilusións máxicas comparten protagonismo coa música rock. Led Zeppelin, Bob Dylan,Los Suaves e infinidade de rock stars están presentes neste espectáculo a través dunha banda en directo que son o complemento perfecto á maxia do xenial Mago Teto.
