A responsábel de Emprego, Industria, Medio Ambiente e Política Demográfica, Rosa Ana García, visitou o Centro de Transformación A Fusquenlla de Moeche, un dos 11 centros integrados na Rede Provincial de Espazos de Coworking da Deputación da Coruña, xunto con representantes do Laboratorio Ecosocial do Barbanza, que se interesaron no modelo da Rede e no funcionamento do centro. Na visita participaron tamén a deputada Cristina García Rey e a alcaldesa de Moeche, Beatriz Bascoy.
Referente en produtos locais do campo e da horta
Centro de Transformación A Fusquenlla posicionouse como un referente na valorización de produtos locais do campo e da horta. Este centro, dedicado á transformación de produtos agroalimentarios baixo criterios de sustentabilidade e calidade, busca contribuír ao fortalecemento do tecido empresarial rural e promover o desenvolvemento económico e social da súa contorna, cun especial enfoque na sustentabilidade e o respecto polo medio ambiente. Dando servizo aos municipios de Cerdido, Moeche, San Sadurniño, Valdoviño, Cedeira, Narón e As Pontes o Centro da Fusquenlla permite a pequenas explotacións e particulares da provincia da Coruña procesar as súas colleitas e elaborar produtos como conservas vexetais, zumes, marmeladas e mel, contribuíndo ao aproveitamento e transformación de produtos agroalimentarios locais e promovendo un sistema alimentario sostíbel.
O da Fusquenlla é un proxecto de especial interese para o Laboratorio Ecosocial do Barbanza, que busca conectar con outras iniciativas para poder aprender das súas experiencias e establecer unha rede de coñecemento sobre a xestión sustentable do territorio.
O Laboratorio Ecosocial do Barbanza nace para facilitar o cambio a un modelo multifuncional dos montes do Barbanza, e para impulsar a transición cara a sustentabilidade ambiental e a resiliencia do territorio ante os lumes forestais que a comarca sofre con frecuencia. O proxecto conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
Integran o Laboratorio Ecosocial do Barbanza a Fundación RIA (entidade coordinadora), a Plataforma pola Defensa do Monte, a Universidade de Santiago de Compostela (a través do CISPAC e os grupos de investigación Histagra e Uxafores), a Universidade Pablo de Olavide, o Concello de Rianxo e a Fundación Montescola.
A visita do Laboratorio ao Centro da Fusquenlla está relacionada coas accións dinamizadas neste proxecto pola Plataforma pola Defensa do Monte e que contan coa colaboración da CMVMC de Baroña, centradas en promover a gandería rexenerativa e a posta en marcha dun centro de transformación de materias primas no Barbanza.
Na visita deste 28 de agosto asistiron Rafael Saco, presidente da Plataforma pola Defensa do Monte; Ovidio Queiruga, presidente da Comunidade de Montes Veciñais en Man Común de Baroña; e Adrián Capelo, representante da Fundación RIA e coordinador do proxecto; que xunto coa deputada Rosa Ana García compartiron ideas sobre o papel do Centro de Transformación A Fusquenlla como motor de oportunidades para o rural e reafirmaron o seu compromiso de seguir colaborando en iniciativas que promovan un futuro máis sustentábel.
A Deputación da Coruña está a explorar novas iniciativas para impulsar o desenvolvemento sostíbel tamén na comarca do Barbanza.
