O rexedor de Ribeira, Luís Pérez Barral, o tenente de alcalde, Vicente Mariño, e a enxeñeira municipal fixeron este 6 de agosto unha visita ao núcleo de Lixó, na parroquia de Palmeira, para supervisar as obras que se están a acometer dirixidas a cubrir unha necesidade demandada pola veciñanza: a habilitación da rede de saneamento (“que permitirá unha correcta xestión dos residuos”) e da liña de abastecemento de auga para consumo doméstico.
Segundo explicaron Luís Pérez e Vicente Mariño, as obras avanzan a un bo ritmo pese a dificultade que se atoparon os técnicos da empresa adxudicataria coas laxes de granito cando estaban procedendo á escavación da gabia.
A adxudicación da obra foi concedida á empresa Excavaciones Mina S.L. cun orzamento total de 149.876,17 € a levar a cabo en catro meses.
“Grazas a actuación como esta a veciñanza de Lixó disporá de dous servizos esenciais como son a auga para consumo e o saneamento, por tanto seguimos avanzando na dotación de servizos fundamentais a núcleos que até agora carecían deles” concluíu o rexedor.
