Este xoves a creatividade xuvenil toma a palabra en Rianxo, con motivo dos obradoiros de cultura urbana que organiza a Secretaría Xeral de Lingua (ao abeiro do programa FalaRedes e coa colaboración do Concello) e que inclúe unha xeira participativa de rap, de estampado de camisetas e de breaking (a partir das 19.00 horas no Campo de Arriba e na praza de Castelao, este xoves 8 de agosto); e máis un espectáculo chamado Ópera Break’s, que se celebra na praza de Castelao a partir das 21.30 horas.
Ópera Break’s é un espectáculo que mestura ópera, breakdance, beatbox e Dj nunha única función de gran calidade artística que brota da conexión da soprano noiesa Esperanza Mara e os artistas urbanos do colectivo Vella Escola. Contan unha historia a través da expresión musical e corporal e rompen as barreiras do clásico e do urbano, fusionándose nun espectáculo multidisciplinar onde todo o inimaxinábel pode suceder…
