Dende DAGA do Barbanza Salnés (a Delegación da Asociación Galega de Apicultura que dirixe Fernando Cores) chéganos un recordatorio de que están abertas as inscricións para o seu curso formativo de verán para a elaboración de hidromel. Celebrarase o 13 de xullo en formato presencial, no número da rúa Condado na Pobra do Caramiñal, en horario de mañá (de 10.00 a 14.00 horas) e de tarde (de 16.00 a 19.30 horas). A actividade (teórica e práctica) será impartida por Argimiro Porto.
Quen precise máis información do curso ou inscribirse pode chamar ao número 609831755 ou ben enviar un correo electrónico á conta dagabarbanzasalnes@apiculturagalega.gal.
Para quen non o saiba, o hidromel é unha bebida alcohólica fermentada a base de mel e auga. Consumida desde a antigüidade, a súa fabricación é anterior á do viño e seguramente á da cervexa, segundo se fai saber na Galipedia, onde se engade que tamén foi unha bebida consumida polas culturas celta, saxoa e viquinga, e mesmo, alén do Atlántico, pola cultura precolombina dos maias.
