A Casa do Mar de Corrubedo acolleu este martes 5 de xuño un acto público do BNG no que se fixo un chamamento “á mobilización masiva o próximo domingo” para encher as urnas coa papeleta do “do equipo da casa” e “que Galiza conte así cunha voz firme que defenda os intereses dos galegos e das galegas na Unión Europea”. Na cita participou a concelleira e candidata Antía Alberte, o alcalde de Ribeira Luís Pérez e a deputada do BNG, Rosana Pérez.
Antía Alberte analizou a importancia de votar nestas eleccións europeas xa que, segundo dixo, “xogámonos moito nestas eleccións” e apelou ao conxunto da cidadanía a votar “con ilusión” pola “candidatura de país que representa o BNG”, que, apuntou, “sempre vai dar a cara polos galegos e as galegas”. Ademais, Alberte incidiu en que “os nacionalistas traballarán por acadar unhas normativas ambientais que protexan a natureza de Galiza ao tempo que se ten en conta o punto de vista social e económico”.
Pola súa parte, o alcalde ribeirense, Luís Pérez Barral, defendeu “o dereito de Galiza a decidir en Europa con voz e voto sobre todos aqueles asuntos que lle afectan directamente, como é o caso da pesca, que exemplifica”, dixo, “o moito que se xoga o país nas eleccións europeas”. Pérez Barral, asegurou que “o sector pesqueiro enfronta enormes retos: cotas de pesca, normativas que non sempre teñen en conta as nosas especificidades, proxectos ameazantes como a eólica mariña en caladoiros ou megacelulosas como Altri que poden danar o río Ulla e a ría de Arousa”. Nestas circunstancias, comentou, “necesitamos alguén que defenda a nosa posición con firmeza, coñecemento e paixón. Ana Miranda e o BNG fixérono e a partir do 9 de xuño farano con máis apoios”.
A deputada no Parlamento galego encargada de asuntos do mar, a pobrense Rosana Pérez, recordou que “en Europa decídese dende canto pode pescar a frota galega, ata o ancho e longo dos seus barcos, pasando por un reparto de cotas inxusto ou por tentar eliminar as redes do xeito sen saber que son precisamente as máis sostíbeis; e non o conseguiron porque alí estaba Ana Miranda defendendo a pesa galega, dándolle voz aos mariñeiros, ás redeiras e a todo o sector”, recordou, engadindo que”Galiza é unha nación pesqueira e a xente do mar non pide axudas nin subvencións para desguazar barcos, pide vivir do seu traballo como leva facendo xeración tras xeración”. Pérez argumentou tres grandes motivos polos que escoller o BNG; “primeiro porque é o partido que máis fala dos temas que importan aos galegos e galegas; segundo porque seremos unha barreira fronte o belicismo e a ultradereita e terceiro porque é garantía de defender a paz e as causas xustas”. Por iso, concluíu a súa intervención animando á cidadanía a “coller a papeleta” nacionalista, a da “candidatura 100% galega”, como a única que garante o compromiso inequívoco cos intereses de Galiza e dunha Europa social, antifascista e que aposte pola paz nas relacións internacionais.
