O veciño estaba a cortar un exemplar nunha leira da súa propiedade. Malia os esforzos, nada puido facerse por este septuaxenario da parroquia muradana de Serres: a árbore golpeouno fortemente na cabeza, tal e como explicou un dos alertadores a través do 112 Galicia.
Pola súa banda, unha dotación de Urxencias Sanitarias de Galicia-061 acudiu ao lugar do accidente a bordo do helicóptero medicalizado con base en Santiago, aínda que sen éxito. Tamén colaboraron os efectivos do Grupo Supramunicial de Emerxencias de Muros, que á súa chegada puideron confirmar as primeiras sospeitas: o home estaba falecido pola caída da árbore que estaba a cortar.
O tráxico accidente produciuse no ámbito privado, xa que ocorreu nun predio da propiedade do falecido. Eran preto das catro desta tarde cando se recibiron os primeiro avisos.
