A Pobra do Caramiñal, a través do Club Náutico Arousa Norte, comezou a conta atrás para a 16ª edición da Volta a Ons. A clásica regata que organiza o Club Arousa Norte, puntuábel para a Copa Xunta de Galicia, conta co patrocinio do Clínica Dr. Gonzalo López e de Atlantic Dental Institute.
Con saída prevista ás 11:30h desde as inmediacións da rada pobrense, unha vintena de embarcacións procedentes de distintos clubs náuticos das Rías Baixas tentarán levar ás súas vitrinas o prezado Faro de Ons de Sargadelos. Desde primeira hora da mañá a mariña da Pobra será un fervedoiro de tripulantes ultimando os detalles das súas embarcacións para dispoñerse a realizar un percorrido de 35 millas co obxectivo de circunnavegar as illas de Ons e Onza e regresar ao porto de O Caramiñal.
A previsión meteorolóxica anuncia un nordeste de 20 nós que farán que a ría “se converta no marco perfecto para gozar dunha espectacular xornada de regata”, informou a organización.
Entre os favoritos á vitoria final atópanse embarcacións que xa saben o que é gañar esta prestixiosa regata, como o pobrense José Manuel Pombar patroneando o seu Cámping Ría de Arousa, ou o Orlando, de Gerardo Sánchez que o ano pasado fíxose coa clase cruceiro. Outros candidatos á vitoria final son o Ronautica Mariñas, de Joaquín Carneiro “Piri”, un clásico da ría de Pontevedra e da Volta a Ons, os vilagarciáns Santana´s e Narval, o barco local Chispetrén, ou o Ziralla de Ramón Barreiro.
