Esta fin de semana celébrase un dos grandes eventos deportivos da comarca nesta primavera: a Andaina de Porto do Son da II Liga Galega de Sendeirismo que organiza o Club Trabandainas (coa colaboración da Área de Deportes do Concello), incluída no Calendario de Actividades da Federación Galega de Montañismo.
A andaina, que pechou este mércores o seu período de inscricións, celébrase este domingo 26 de maio con formato de ruta circular dende a fachada marítima de de Porto do Son e con percorridos de 25 e 15 quilómetros.
A recta final do prazo de inscrición acompañouse cun vídeo nas redes onde a presidenta de Trabandainas, Pilar Santamaría, reivindica o importante valor paisaxístico, ambiental e cultural da ruta, que agasalla ás persoas participantes impresionantes vistas da ría de Muros e Noia durante boa parte do treito e lles permite coñecer tesouros etnográficos como a ruta dos muíños ou o propio centro histórico de Porto do Son, onde comeza e remata o percorrido. “Trátase dunha ruta moi doada de percorrer, cun desnivel positivo máximo de 670 metros sobre o nivel do mar”, explica.
Distancia: ruta circular de 25 quilómetros, aproximadamente.
Distancia alternativa: ruta Circular de 15 quilómetros, aproximadamente.
Dificultade: media.
Entrega de dorsais: dende como 7:30 a 8:45 horas.
Punto de Saída: fachada marítima de Porto do Son.
Inicio da Andaina de Porto do Son 25K: 9:00 horas.
Inicio da Andaina de Porto do Son 15K: 9:05 horas, a continuación da saída de 25K.
Punto de Chegada: fachada marítima de Porto do Son.
Percorrido: sairase da fachada marítima de Porto do Son e logo dun treito a carón do mar (deixando atrás o miradoiro da Atalaia, o paseo do Fonforrón, o paseo de Arnela, o Castro de Baroña, os muíños e ruínas da capela de San Telmo, os sendeiros e camiños da Comunidade de Montes de Baroña) as e os participantes regresarán a Porto do Son, polo paseo da igrexa parroquial de San Vicente de Noal.
