Catorce profesionais municipais participan no 1º encontro de técnicos de turismo da Costa da Morte e de Muros-Noia

17 Abril 2024

Un total de catorce técnicos de turismo celebraron o I Encontro de técnicos/as de turismo da Costa da Morte e Ría da Estrela (ría de Muros-Noia) en Carnota. Unha xuntanza na que participaron, entre outros, profesionais dos Concellos de Dumbría, Carballo, Ponteceso, Fisterra, Vimianzo, Zas, Coristanco, Muros, Serra de Outes e Porto do Son.

María Lago, técnica de turismo do Concello de Carnota, explica que “non se trata só dunha xornada teórica, senón de coñecer o territorio de primeira man e de interactuar entre nós para que poidan xurdir ideas e proxectos de interese para o territorio”. Espérase que este primeiro encontro sirva para que outros concellos lle dean continuidade a esta iniciativa co obxecto de crear sinerxías presentes e futuras.

Como comentaba María Lago, esta xuntanza completouse co desfrute dalgunhas experiencias turísticas no municipio de Carnota: a visita ás instalacións do Faro de Lariño, recentemente convertido en hotel; e o percorrido dun tramo da ruta Andar o Mar, salpicada de restos de construcións vinculadas ao mar como casetas de pescadores, antigas fábricas de salgadura e outras máis actuais como a piscifactoría de Lira ou antigas fábricas de conserva.

Para rematar, o grupo visitou a recentemente estreada Caseta de Pepe do Cuco, unha antiga caseta de pescadores que alberga o primeiro museo automatizado de Galicia, ao que se pode acceder a través dun código QR e que actualmente se atopa en fase de probas. No seu interior, varias persoas de Lira falan sobre a evolución do sector pesqueiro e a vida en Lira. O encontro concluíu cun xantar onde os técnicos puideron intercambiar sensación e opinións.

Cada vez son máis os concellos que apostan polo turismo e que contan con persoal técnico durante todo o ano. De aí xurdiu a necesidade de celebrar un encontro deste tipo entre os técnicos de turismo da zona co fin cunha dobre finalidade: dar a coñecer os recursos turísticos locais dos diferentes concellos da zona e compartir inquietudes, experiencias e posíbeis sinerxías, xa que se espera que este sexa o primeiro de moitos encontros deste tipo.

Outros artigos

Domingo regresa o sol e empeza a subir a temperatura

Na xornada do domingo seguiremos con aire frío en altura xerando inestabilidade atmosférica. Unha situación que favorecerá a formación de chuvascos, localmente treboentos, máis probables e frecuentes no interior e nas horas centrais do día. As temperaturas mínimas...

+

Ribeira pon en valor o traballo das mulleres no mar

O Concello de Ribeira conmemorou o Día Internacional da Muller no Sector Marítimo rendendo unha homenaxe a tres mulleres extraordinarias que dedicaron as súas vidas a unha profesión fundamental para a nosa comunidade: o marisqueo. O concelleiro de Mar, Fernando...

+

Publicidade

Revista en papel

Opinión

“Día das Letras Galegas 2025”. Manuel Dominguez

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...