O BNG de Dodro emitiu un comunicado a través do cal esixe explicacións polos recheos efectuados na contorna de Bexo, unhas intervencións que xa motivaron unha pregunta ao Executivo no pleno de hai un mes e que, segundo di a agrupación, aínda está agardando unha reposta. O BNG engade que “a maiores, desde hai días xurdiu outro importante movemento de terras en Reboiras que sorprende á veciñanza”.
A situación, segundo fan saber, é a seguinte: “Camións con escombro traído de fóra para as inmediacións do pavillón polideportivo da Paxareira xunto con escavadora levan días explanando na que fora unha canteira sen que o concello nin tampouco a Comunidade de Montes Balouta e Fontecova deran explicación pública. O mesmo aconteceu o pasado ano co enorme recheo de Bexo promovido pola Comunidade de Montes Abelán”.
Por este motivo, este 27 de febreiro o BNG de Dodro dirixiu un escrito ao Concello “no que esiximos o acceso aos expedientes completos sobre os movementos de terras e recheo nas inmediacións da Paxareira (Reboiras) e do castro As Murallas (Bexo) para informar á veciñanza”.
Segundo explican, “ao igual que en Bexo, a veciñanza descoñece se hai ou non proxecto, licencia ou permisos para as obras tendo en conta que agora o goberno do PSOE prescindiu do arquitecto municipal”. E conclúen: “Ignórase a procedencia dos residuos nos recheos que poderían causar un dano medioambiental ou representar un risco para a saúde pública; o Goberno local ten a obriga de velar pola seguridade e transparencia das obras no seu territorio para evitar desfeitas como as acontecidas cos pasados gobernos do PP”.
