Case un milleiro de traballadoras e traballadores de JEALSA participaron nun acto de repulsa á violencia machista en Bodión (Boiro), na planta conserveira na que traballaba Andrea, a moza asasinada este martes en Palmeira a mans da súa ex parella. No acto, a encargada de poñer voz á empresa foi a directora de Recursos Humanos de JEALSA, Elena Garrido. Entre os asistentes ao acto, estaba o alcalde de Boiro, José Ramón Romero e os líderes da oposición Fernándo García Dieguez (PP) e Raquel Suárez (BNG).
Tamén na planta de Baiuca o alcalde de Pobra do Caramiñal, José Carlos Vidal, xunto con varios membros do Ejecutivo local, sumáronse á concentración da comunidade de traballadoras e traballadores de JEALSA.
Todas e todos as/os participantes mostraron a súa solidariedade coa familia e persoas achegadas da moza asasinada e expresaron o seu firme rexeitamento contra todo tipo de agresión contra as mulleres.
Andrea, levaba desde o ano 2019 traballando na empresa boirense en diferentes campañas. Nesta ocasión, incorporouse o 15 de xaneiro a Bodión. “Era unha moza afable, moi positiva ante a vida, alegre e cun eterno sorriso”, con esas palabras lembrárona esta mañá as súas compañeiras.
Reproducimos aquí a declaración institucional de JEALSA con motivo do feminicidio:
“Todas as persoas que formamos parte de JEALSA queremos mostrar a nosa máis enérxica condena ante o recente acto de violencia machista que se cobrou a vida da nosa compañeira Andrea.
Onte, a esta mesma hora, Andrea despedíase cun “ata mañá” e o seu eterno sorriso. Nada facía pensar que a súa curta vida ía ser truncada dunha forma tan violenta deixando a un pequeno neno orfo e a toda unha familia abatida.
É inadmisible que en pleno século XXI sigamos sendo testemuñas de actos de violencia de xénero que arrebatan vidas, perpetuando un ciclo de sufrimento e dor. Como empresa comprometida coa igualdade, onde as mulleres xogamos sempre un papel determinante, reafirmamos o noso compromiso inquebrantable na loita contra todas as formas de violencia e na defensa dos dereitos humanos de todas as persoas, sen importar o seu xénero.
Como sociedade, debemos unirnos nun firme rexeitamento a calquera manifestación de violencia de xénero e traballar de maneira conxunta promovendo a educación, a sensibilización e a prevención desde todos os ámbitos, para construír unha contorna segura e respectuosa para todas as persoas.
A gran familia JEALSA hoxe quere sumarse á dor e duelo da familia e amigos de Andrea, e brindar este pequeno recordo á nosa compañeira en homenaxe á súa vida e á súa memoria, que estará sempre connosco.
Gardemos agora un minuto de silencio en sinal de homenaxe á Andrea”.
