O Concello de Ribeira celebra este domingo o Encontro das Persoas Maiores no Pavillón da Fieiteira. Espérase dar acollida a máis de 870 persoas maiores de 55 anos ou xubiladas. O evento comezará ás 12:00 horas coa celebración relixiosa na Igraxa Parroquial de Santa Uxía e ás 13:00 horas coa recepción, por parte do alcalde e do Goberno municipal, Luís Pérez Barral, ás persoas participantes.
O alcalde ribeirense, Pérez Barral destacou que este Encontro do Maior “supón unha xornada de convivencia que contribúe a fortalecer os lazos de amizade e permítenos facer unha homenaxe a todas as persoas que tanto e tanto teñen contribuído para conformar o pobo que hoxe é Ribeira”.
Pola súa banda, o edil de Servizos Sociais informou que haberá autobuses, que sairán do porto comercial de Ribeira, para facilitar o acceso e evitar o uso do vehículo particular. “Ademais do xantar, haberá unha boa orquestra para amenizar a xornada da tarde” asegurou Mariño de Bricio.
Entre as principais novidades figura a do propio xantar, que terá como pratos principais os típicos do Entroido (haberá entrantes, 3 mariscos, lacón con grelos, sobremesa de entroido e bebida). Ademais haberá dispoñibilidade menús para persoas intolerantes ou con problemas de alerxias ás que se lle faría un menú especial.
Dende o Concello de Ribeira informan que proceden á “redución de gastos superfluos” e que “a Corporación municipal deberá mercar a entrada como calquera outro veciño”.
Na presentación do Encontro de Maiores que rivo lugar a principios de mes tomaron parte os presidentes do tódolos clubs de xubilados do Concello: Corrubedo, Palmeira, Aguiño e Ribeira.
