Dende o Concello de Lousame veñen de anunciar que no seu pleno municipal acábase de aprobar por unanimidade a proposta da Alcaldía para o Plan Único de Concellos POS+ 2024, que ascende a 357.217,95 euros, así como os 109.592,23 euros do Plan Complementario. Unha unanimidade que se mantivo na aprobación do Plan Adicional 1/2024, que destinará 57.483,35 euros a gastos sociais extraordinarios.
Deste xeito, a Achega Provincial 2023, encamiñada a investimentos financeiramente sostíbeis, será para tres proxectos: a pavimentación das estradas entre Pousada-Carantoña e Cruído-Loureiro (por un importe de 50.245,61 euros), a mellora dos accesos ao núcleo de Abeixón (por 41.139,99 euros) e a mellora do viario na Cabalariza- Fruíme (por 64.640,63 euros).
En canto á Achega Provincial 2024, esta será destinada a gasto corrente: 150.000 euros para sufragar o custe do alumeado público e os restantes 51.191,72 euros a mellora dos accesos a núcleos de poboación.
Asemade, o Pleno municipal acordou as obras do Plan Complementario, que suman un total de 109.592,23 euros: mellora do viario de Lesende a Vilacoba, que inclúe tamén a mellora dos accesos a Soutorredondo (Lesende), mellora do viario entre A Barreira e Guiende (Tállara), ao pé do monte Iroite e que inclúe tamén o arranxo doutros dous viarios na zona cara Arxellas (Camboño) e a mellora de viario no Outeiro (Lousame).
Por último, o Pleno aprobou tamén por unanimidade o POS Adicional 1/2024 para gastos sociais extraordinarios por un importe de 57.483,35 euros. A alcaldesa de Lousame, Teresa Villaverde, explicou que “51.283 euros irán destinados á ampliación do Servizo de Axuda no Fogar, tanto básico como complementario” e salientou que “neste momento Lousame é dos poucos concellos que está dando Servizo de Axuda no Fogar a dependentes con grao 1, e non só aos de grao 2 e 3”. O resto da axuda será destinada a equipamento para o Departamento de Servizos Sociais e para actuacións de axuda a persoas especialmente vulnerábeis.
