Oitenta rapaces do instituto Félix Muriel de Rianxo coñeceron este 7 de febreiro as claves do funcionamento e da actividade diaria da conserveira JEALSA. Foi grazas a unha visita á planta da empresa en Bodión, Boiro, onde os estudantes foron guiados polos directivos da compañía. A visita abeirouse ao programa Empresa Familiar nas Aulas, impulsado por Afundación Obra Social Abanca e a Asociación Galega da Empresa Familiar (AGEF). A iniciativa percorre este ano 18 das principais empresas galegas.
Na súa visita dos estudantes a JEALSA (unha das máis sobranceiras empresas do sector, con 4.000 profesionais dos cales 2.500 son empregos en Galicia), o presidente do grupo, Jesús Alonso Escurís, indicou que a súa compañía contrata anualmente 50 persoas, fundamentalmente mozas e mozos de elevada formación e con dispoñibilidade para moverse. “As empresas familiares temos raíces e preocupámonos por crear riqueza na contorna onde nacemos”, sinalou diante dos 80 alumnos de ESO, bacharelato e FP do Instituto de Rianxo.
Como dixemos, a empresa e o IES Félix Muriel participan no programa Empresa familiar nas Aulas, organizado pola Asociación Galega da Empresa Familiar (AGEF) e Afundación Obra Social Abanca, que ten por obxectivo fomentar a formación e o emprendemento entre os mozos galegos. Jesús Alonso subliñou a importancia da formación para comezar unha carreira profesional, tanto no camiño do emprego asalariado como no do emprendemento.
Empresa Familiar nas Aulas achega os principais empresarios galegos aos colexios e institutos de toda Galicia, coa participación de máis de 2.500 estudantes e 30 empresarios galegos de primeiro nivel. As mozas e mozos galegos xa teñen elaborado e presentado 18 proxectos empresariais co obxectivo de emprender novos negocios.
“Aprendín do meu pai que a prioridade dunha empresa é a supervivencia. As empresas familiares galegas vivimos aquí e contratamos aquí, como a nosa, dende 1958”, explicou o presidente de JEALSA. A firma galega é hoxe unha corporación formada por 27 sociedades integradas en 3 divisións de negocio (alimentación, valorización e enerxía). Ademais, produce 1.500 millóns de latas de conservas anuais, un 45% de toda a produción conserveira española de peixes e mariscos. O grupo está experimentando tamén un forte crecemento na súa división de Valorización, coa fabricación de alimentos para mascotas e produtos para cosmética e farmacia a partir dos descartes e restos da alimentación humana.
