O alcalde, José Ramón Romero, xunto coa concelleira de Ensino, Carmen Silva, visitaron este luns 15 de xaneiro ás persoas participantes no grupo de intercambios lingüísticos do Concello de Boiro. A iniciativa ten como finalidade fomentar que as persoas participantes compartan coñecementos sobre a lingua e a cultura dos países de procedencia das persoas asistentes.
O grupo, integrado por 20 persoas, divídese á súa vez en pequenos grupos en función das preferencias de aprendizaxe de cada persoa. “É unha experiencia moi enriquecedora que permite non so familiarizarse cunha lingua senón compartir experiencias e intereses con persoas de procedencias moi distintas”, recoñeceu o alcalde.
A proposta xurdiu dos equipos de normalización e dinamización lingüística de centros educativos e de estudantes de Erasmus que buscaban aprender galego e español ademais de compartir a súa lingua con aquelas persoas que desexan reforzar, practicar ou aprender outros idiomas.
