Un home tivo que ser evacuado en helicóptero ao resultar ferido de gravidade tras caer da súa bicicleta na parroquia boirense de Abanqueiro.
A alerta chegou ao 112 Galicia a través da chamada dun particular, quen dez minutos despois das 10 horas indicou que o implicado precisaba asistencia sanitaria urxente tralo accidente, rexistrado na parroquia boirense de Abanqueiro.
De inmediato, os xestores do 112 Galicia solicitaron a acción de Urxencias Sanitarias de Galicia-061, da Garda Civil de Tráfico, da Policía Local e dos membros do Servizo Municipal de Protección Civil.
Instantes despois, desde Urxencias Sanitarias de Galicia-061 confirmaron que estaban a mobilizar o helicóptero medicalizado con base en Santiago, no que o ferido foi finalmente evacuado ao hospital de referencia.
Por último, os efectivos de Protección Civil encargáronse de realizar a limpeza da vía, que permaneceu cortada durante os traballos.
