A sociedade Solo Empresarial do Atlántico (SEA) fixo realidade este 29 de decembro dúas novas operacións nos
parques empresariais de Muros e Catoira. Trátase de dous acordos que, en palabras da xerente de SEA, Beatriz Sestayo, “afianzan o dereito de superficie como unha excelente opción para as compañías, que dispoñen da posibilidade de ocupar parcelas industriais con todos os seus dereitos durante 30 anos en réxime de alugueiro, pero beneficiándose da oportunidade de mercar a superficie que ocupan no primeiros cinco ou dez anos se así o decidisen”.
Segundo explicou, o dereito de superficie facilitou a implantación dun bo número de empresas durante 2023 nos polígonos industriais xestionados por SEA. É o caso da compañía Insuapesca, dedicada á comercialización de peixes e mariscos, que construirá as súas novas instalacións no Parque Empresarial de Muros tras asinar este venres un acordo con SEA.
Pola súa banda, Loxística Garmou tamén se beneficiou desta modalidade que lle permitirá ocupar unha parte da superficie do Parque Empresarial de Catoira.
