A concelleira de Comercio de Ribeira, Veva Betanzos, e o alcalde de Ribeira, Luís Pérez, acompañados do presidente da Asociación de Empresarios, Francisco Martínez Gude, presentaron o programa de Bonos QR AmaRibeira, unha iniciativa que ten por obxectivo o fortalecemento do sector comercial local e dos establecementos hostaleiros do termo municipal.
Segundo explicou Betanzos, “cada usuario disporá dun saldo de 30 € para a realización do desconto nas compras. Ditos descontos serán de 10 € por cada 30 € de compra mínima, ata un máximo de 30 € de desconto por persoa usuaria do bono QR, de maneira que o Concello de Ribeira subvencionará o 33,33% de cada compra”.
O importe do bono poderase consumir nas compras de bens e servizos realizadas nos establecementos adheridos ao programa entre o 15 de decembro e o 31 de xaneiro de 2024. A edil e o alcalde engadiron que poderán adherirse todos os establecementos comerciais e de hostalería que desenvolvan a súa actividade no concello de Ribeira no réxime de persoas autónomas ou pequenas e medianas empresas (pemes), a través da páxina web AMARibeira.gal.
“O propósito destes bonos, que xa propuxemos hai tres anos, é a potenciación do tecido comercial e hosteleiro da nosa localidade, así como tamén axudar ás familias nas compras destas datas”, explicou o alcalde Luís Pérez.
Esta iniciativa forma parte dunha campaña integral de dinamización do comercio local, xunto co convenio de colaboración coa Asociación de Empresarios de Ribeira e a posta en marcha de tarifas especiais para o estacionamento no estacionamento do Centenario.
Na presentación tamén estiveron presentes os concelleiros Vicente Mariño e Francisco Suárez-Puerta.
