O Concello de Ribeira vén de adxudicar o proxecto para mellora da seguridade viaria nos pasos de peón na avenida da Coruña, a principal vía de entrada na cidade. Fíxoo cun orzamento de licitación de 88.425,19 euros. O proxecto, que se realizará nun prazo de 20 días, inclúe a realización dunha serie de actuacións de obra civil e a instalación de luminarias LED, radares pedagóxicos de alimentación solar para vehículos e balizas LED lonxitudinais encaixadas na beirarrúa.
Segundo informou o Concello, o propósito desta obra é o de “reducir a sinistralidade de peóns e ciclistas, por mor da análise realizada da sinistralidade por parte da Policía Local de Ribeira, que identificou 4 localizacións prioritarias onde se debe actuar”.
O alcalde Luís Pérez Barral explicou que estas localizacións están emprazadas ao longo da avenida da Coruña, nos números 149, 92, 82 e 6. “Instalaranse luminarias especificamente deseñadas para garantir unha óptima visibilidade nos devanditos pasos de peón e tamén se repintará cada paso de peón con pintura branca antiescorregadiza”, engadiu o rexedor.
Esta actuación está contemplada na acción A02 do proxecto Máis Ribeira Atlántica 2020 que posteriormente pasaría a agruparse na A12 (Modernización da Administración e Smart Village Ribeira), co-financiado nun 80% por fondos FEDER, dentro do Programa Operativo de Crecemento Sustentábel (POCS) 2014-2020, actualmente integrado no Programa Operativo Plurirexional de España (POPE).
