O 112 Galicia recibiu, minutos antes das 19:30 horas da tarde do domingo, a chamada dun familiar da ferida, quen tamén viaxaba no vehículo implicado. Este caeu por un desnivel localizado nas proximidades do centro de saúde, en Urdilde. Naquel momento, unha muller permanecía no interior do coche e requiría asistencia sanitaria.
Rapidamente, os xestores do Centro Integrado de Atención ás Emerxencias informaron aos profesionais de Urxencias Sanitarias de Galicia-061, aos membros do GES de Brión e de Padrón, á Garda Civil de Tráfico e aos voluntarios de Protección Civil de Rois.
Os efectivos do GES cortaron parte dun dos asentos do vehículo para liberar á muller, que foi evacuada en ambulancia ao hospital de referencia e, a continuación, procederon a limpar a vía, na que quedaran esparexidos diversos restos a raíz do accidente.
