Este mércores 1 de novembro levantouse o pano da XXIV Mostra de Curtas Vila de Noia, cuxa sección oficial desenvolverase até o novembro. A cita inaugurouse coa proxección de Amigos hasta la muerte, o debut do galego Javier Veiga, que contou cun Coliseo Noela ateigado de público e coa presenza do elenco protagonista (Javier Veiga, Marta Hazas, Xosé Antonio Touriñán, David Amor e Patricia Castrillón).
Na inauguración do festival tamén estiveron presentes o presidente da Academia Galega do Audiovisual, Álvaro Pérez Becerra, e o concelleiro de Cultura de Noia, José Pérez, que foron os encargados de dar a benvida e inaugurar esta edición da mostra. Logo da proxección tivo lugar no Coliseo Noela (sede habitual das proxeccións) un coloquio co público asistente. Por certo que a organización pendurou nas redes sociais un vídeo-resumo da inauguración desta XXIV convocatoria do festival, entre outros contidos.
O programa da mostra incluirá estes días unha xornada que leva o nome de Cousas de aquí e que servirá como escaparate para os traballos locais, por exemplo Rodrigo Romaní, vibración e silencio, de Ignacio Carnota.
Ademais, farase entrega do Premio Honorífico da Mostra, que este ano será entregado ao actor galego Javier Gutiérrez, gañador de dous premios Goya e natural de Ferrol. Ten protagonizado grandes éxitos (de público e artísticos) do cinema español recente, como por exemplo Durante la tormenta (2018), de Oriol Paulo; Campeones (2018), de Javier Fesser; ou El olivo (2016), de Icíar Bollaín. Tamén protagonizo, entre outras moitas, O descoñecido (2015), do galego Dani de la Torre, rodada na Coruña.
O cartel deste ano é obra do artista Xosé Luis Axeitos.
Máis información (puntual e actualizada) no Facebook do certame.
Na súa 23ª edición, as grandes triunfadoras foron a cinta escandinava Tonser, Premio á Mellor Curtametraxe na Mostra Vila de Noia; Mañana Volveré, de Hugo de la Riva, Premio Especial do Público; e o actor e director Iván Marcos, quen recibiu o galardón honorífico. O ano pasado tamén pasou á historia pola emotiva homenaxe ao actor, director e humorista galego Pedro Brandariz, recentemente falecido.
