O Conservatorio de Noia Felipe Paz Carbajal vai acoller un obradoiro práctico para axudar aos novos talentos a superar a ansiedade escénica, organizado polo Conservatorio de Noia en colaboración coa ANPA e impartido por Chus Vega, profesor de saxo e psicólogo. Celebrarase o vindeiro sábado 16 de decembro, de 10 a 14 horas, no Coliseo Noela, cun número máximo de asistentes de 30.
Segundo informan dende a organización, ao remate desta actividade formativa as persoas participantes estarán en disposición de entender a influencia da ansiedade escénica na execución persoal en probas, audicións e concertos; de identificar os procesos psicofisiolóxicos da ansiedade escénica para poder controlalos; e de poder aplicar técnicas específicas na práctica diaria cos seus instrumentos. Tamén estarán capacitadas para preparar calquera intervención ante o público.
