Este venres 17 de novembro o escritor ribeirense Carlos Callón vai presentar en Dodro a súa obra máis recente, O libro negro da lingua galega. Será na Biblioteca Municipal de Dodro, as oito da tarde.
Trátase dun volume que recolle e explica testemuños da represión lingüística en Galiza ao longo dos séculos aportando ademais moitos documentos pouco ou nada coñecidos.
Nas súas páxinas falase da crueldade dos castigos nas escolas por falar na lingua prohibida, acreditados desde 1543 até 1980; das multas en tempos de Franco por falar galego; das inspeccións por “esaxerado acento galego” ou a profanación da lápida de Alexandre Bóveda para castelanizala.
“Será”, explicou o Concello, “unha oportunidade para falar co autor e saber máis da historia do galego e de Galicia”.
Trátase dunha actividade organizada polo concello de Dodro coa colaboración da Deputación da Coruña.
Desde a súa publicación, O libro negro da lingua galega está a contar cunha acollida excelente e máis de 3.000 persoas participaron xa nos actos de presentación. O autor considera que esta boa recepción se debe a que “o galego está hoxe nunha encrucillada para o seu futuro e unha parte significativa da sociedade non está disposta a que se continúen a cometer inxustizas contra o noso idioma natural”. “Para mudarmos o futuro é preciso coñecermos o pasado e neste libro explícase por que a nosa lingua propia está hoxe como está, non é algo natural a súa discriminación”, conclúe.
