A deputada no Congreso dos Deputados, Verónica Martínez Barbero, participará este mércores 25 de outubro nun acto de Sumar Galicia en Noia. Será ás 20:30 horas no Edificio do Antigo Casino, onde acompañarán á deputada o concelleiro noiés Manolo Seijas e a referente local Lola Caramés.
O obxectivo destes encontros, que se celebrarán ao longo de todo país, é, segundo Martínez Barbero, “o de trasladar á cidadanía o traballo de Sumar Galicia no Congreso dos Deputados, ademais de escoitar as problemáticas máis importantes da comarca para buscar solucións, sempre dende a nosas firmes conviccións progresistas e da defensa dos dereitos das persoas traballadoras”.
Martínez Barbero confirma que “é coñecedora da nefasta campaña marisqueira, que leva á perda de emprego de máis dun millar de persoas”, e que, sen dúbida “terá consecuencias económicas moi graves para a comarca”. Por iso, engade, é importante que a administracións, sobre todo a Xunta de Galicia, realicen políticas claras de “protección social”. Dende Sumar Galicia confirman que, logo dunha xuntanza co grupo municipal da Marea de Noia, “trasladarán de xeito urxente ao Ministerio de Inclusión, Seguridade Social e Migracións acelerar o trámite por parte do ISM dos ceses de actividade das campaña marisqueira, dun xeito máis áxil e eficiente”.
