Os dous detidos por este tráxico suceso pasaron a disposición xudicial e a maxistrada do xulgado número un, na que recaeu a causa enviou a prisión provisional comunicada e sen fianza a Iván Méndez Fernández, de 30 anos e veciño de Teo. É o fillo dun coñecido empresario local, dono da firma Guindastres Castmart, e asegurou que era el o que conducía o vehículo, o que fixo que a súa noiva, Débora Gómez Chouza, de 27 anos de idade e natural de Ribeira, quedase en liberdade pero coa obriga de comparecer cada quince días no xulgado.
Segundo recolle La Voz de Galicia, en comisaría Iván Méndez non quixo declarar, aínda que si o fixeron tanto el como a súa noiva no interrogatorio ante a xuíza. No xulgado modificou a versión que deu nas súas primeiras manifestacións á Garda Civil, cando relatou que estivera facendo garda na rúa Poza Real de Arriba de Santiago porque quería sorprender ao autor das picadas a rodas de automóbiles que, segundo dixo, estaban a producirse neste lugar.
Engadiu que lle pareceu verlle danando un vehículo e quixo darlle un susto, pero a situación fóiselle das mans e acabou coa morte do veciño. Agora sinalou que o sucedido foi «un lamentable accidente de tráfico», explica o seu avogado.
obarbanza.gal
