Agora que nos partidos políticos falan máis de coser que de solucionar, o presidente en funcións do Goberno español, presunto candidato á reelección -se o Rei propón a súa investidura- Pedro Sánchez, disque dá un paso avante na designación de candidato a presidente da Xunta de Galicia, nas próximas eleccións autonómicas, polo PS de G. PSOE.
De ser así, Xosé Ramón Gómez Besteiro, avogado, ex-delegado do Goberno en Galicia, ex-presidente da Deputación provincial de Lugo, ex-secretario xeral do PS de G-PSOE e actual deputado no Congreso pola provincia de Lugo, terá a oportunidade de representar ao seu partido nos vindeiros comicios autonómicos como candidato á presidencia da Xunta.
Non será, polo tanto, Gonzalo Caballero, nin o ministro de Sanidade en funcións, José Miñones, quen encabece a listaxe dos socialistas nesa nova andaina cara ao posto de máxima responsabilidade política na Comunidade Autónoma de Galicia.
De acadar tal responsabilidade, Gómez Besteiro sería o terceiro presidente socialista na historia deste territorio, após Fernando González Laxe (1987-1990) e Emilio Pérez Touriño (2005-2009). En ambos os casos, coaligado o PS de G-PSOE. O primeiro, con CG, PNG-PG e PSG-EG, e o segundo, con BNG.
Curiosamente, só os gobernos con presidentes socialistas (xa citados) foron coaligados. Non así os de AP e PP, que gobernaron con maiorías.
Na preautonomía galega presidiron a Xunta Antonio Rosón Pérez e José Quiroga Suárez. O primeiro presidente que tivo a Xunta de Galicia foi Gerardo Fernández Albor. O presidente con máis tempo no cargo foi Manuel Fraga Iribarne (1990-2005).
