Este 16 de setembro comezan na parroquia de Nebra (Porto do Son) as festas da Romaría da Valvanera. Celebraranse entre o sábado 16 e o martes 19 de setembro. A axenda festiva inclúe as actuacións da Banda de Música de Caamaño, Son da Ría, Miguel Torres, Dúo Rumbo Norte, orquestra Acordes, Aires de Broña e orquestra Fuego Galicia.
As celebracións comezan o sábado 16 (o día grande das festas) ás 9.00 da mañá coa procesión das imaxes dende distintas parroquias. Ás 10.00 chegarán as imaxes da Virxe e celebrarase o encontro coa representación da Anunciación. Ás 12.00 haberá misa e ás 13.00 están previstas as actuacións da Banda de Música de Caamaño e o grupo Son da Ría. Logo da sesión vermú haberá (arredor das 14.00 horas) unha exaltación de polbo e ás 17.00 está prevista unha gran foliada con grupos populares. Polo serán (ás 20.00 horas) volverá a música con Miguel Torres e o Dúo Rumbo Norte.
O domingo será o día para honrar á Virxe das Dores. Haberá misa solemne ás 13.00, seguida de procesión, e música co grupo de gaitas Son da Ría. A verbena virá da man da orquestra Acordes.
O luns, na honra de Santo Antonio, haberá misa solemne e procesión (ás 12) e logo volverá actuar o grupo de gaitas Son da Ría. Para a verbena contarase con Aires de Broña. O martes, na honra da Nosa Señora de Valvanera, haberá misas a diferentes horas (9, 10, 11, 19 e 20h) e unha misa solemne con procesión ás 12h. Actuará a Banda de Caamaño e pola noite a orquestra Fuego.