Foron os propios afectados quen contactaron co 112 Galicia pasadas as sete da tarde de onte.
Na súa comunicación indicaron que a bordo da embarcación navegaban dúas persoas, e unha delas recibira un golpe nas costelas que lle dificultaba a respiración.
De feito, tras recibir os primeiros coidados polos profesionais de Urxencias Sanitarias de Galicia-061 no porto de Ribeira, só esta persoa tivo que ser evacuada ao centro hospitalario de referencia.
Segundo explicaron os afectados, a embarcación na que navegaban chocou contra unha batea preto da Illa de Pedregoso, en Arousa. Como consecuencia do impacto, unha das persoas que ía a bordo resultou ferida, pero, ademais, necesitaban un rescate para saír da auga.
Neste sentido, desde o 112 Galicia, solicitouse a colaboración de Salvamento Marítimo, que enviou á zona a Salvamar Sargadelos. A bordo desta embarcación, os feridos foron trasladados ao porto de Ribeira, onde agardaba unha ambulancia de Urxencias Sanitarias de Galicia-061 para ofrecer os primeiros coidados.
Neste operativo contouse, tamén, coa participación do grupo municipal de emerxencias de Ribeira, así como dos axentes de seguridade da Policía Local e da Garda Civil.
