Denuncian á mineira de San Finx ante a relatora especial da ONU polo “uso de denuncias abusivas”

A plataforma Ecoloxistas en Acción vén de poñer en coñecemento da relatora especial das Nacións Unidas sobre a situación das persoas defensoras de dereitos humanos, a irlandesa Mary Lawlor, o uso sistemático de denuncias abusivas e infundadas por parte da empresa mineira de San Finx, Tungsten San Finx S.L., contra as organizacións ecoloxistas e sociais que veñen denunciando a situación ilegal da explotación e os danos ambientais que causan as súas verteduras, a tan só 7 quilómetros da ría de Muros e Noia.

A base desta acción da plataforma é unha nova querela contra a mesma imposta pola empresa, desta volta por un acto simbólico realizado o pasado 5 de xullo no que se taponou durante breves instantes o tubo a través do que a empresa realiza vertidos ilegais.

Precisamente a raíz desta protesta e dos escritos remitidos a Augas de Galicia por ese colectivo e a plataforma comarcal contra as verteduras, vense de iniciar un procedemento sancionador que podería carrexar unha sanción de ata 300.000 euros á empresa, logo de comprobarse que os niveis de cadmio no río a poucos metros do tubo taponado superan 78 veces o máximo legal permitido.

A raíz da nova denuncia da empresa, que os ecoloxistas cualifican de “falsa” (e que atribúe a Ecoloxistas en Acción un suposto delito de danos), o Xulgado de Instrución N.º 2 de Noia abriu dilixencias, sendo chamado a declarar como investigado o representante da organización. Para as ecoloxistas, “isto non é máis do que unha tentativa desesperada da empresa de calarnos a través dunha acción xudicial contra a participación pública”, coñecidas como SLAPP en inglés, e que a Comisión Europea anunciou que perseguiría mediante a nova “Directiva SLAPP”.

A organización lembra que se trata da segunda vez, en menos dun ano, que o grupo australiano presenta unha denuncia falsa contra Ecoloxistas en Acción, que xa fora denunciada en 2022 ante o Xulgado de Negreira baixo un pretexto similar, meses antes de que a Xunta declarara a caducidade das concesións mineiras e de que se iniciase un procedemento sancionador por verteduras ilegais contra a mina de Santa Comba. Daquela, o Xulgado arquivou a demanda de inmediato por “carecer de fundamento”.

Aínda que desde a organización ecoloxista confían que o resultado desta volta será idéntico, decidiron denunciar o caso ante a relatora especial da ONU por tratarse, ao seu xuízo, “dun uso sistemático do acoso xudicial tentando criminalizar e coartar os movementos sociais para que non denuncien as ilegalidades cometidas polas empresas”. Esperan deste xeito que “a relatora, que vén denunciando este tipo de prácticas en todo o mundo, se dirixa ás autoridades xudiciais españolas para tomar medidas contra a empresa”. En calquera caso, advirten que “ningún tipo de acción xudicial ou ameazas doutro tipo fará con que cese no seu traballo de denuncia das ilegalidades da mina de San Finx”.