A Casa da Cultura de Boiro vai acoller este xoves 21 de setembro unha mesa redonda arredor da figura de Ramón Martínez López e o Seminario dos Estudos Galegos. Será a partir das 19.00 horas. Trátase dunha cita cultural de investigación e investigación organizada polo Concello de Boiro e o Museo do Pobo Galego con motivo do Centenario do Seminario de Estudos Galegos. A mesa estará moderada por Mercedes Rozas e contará coa participación de Amancio Liñares, Aurora Marco e Xesús Laíño.
Esta mesa redonda complementa outras homenaxes que se están a celebrar en Boiro arredor do galeguista local Ramón Martínez Boiro, homenaxes entre os que se incluíu o descubrimento dunha placa na casa onde naceu, en Cimadevila, coincidindo co aniversario do nacemento de Ramón Martínez López (o 4 de abril). “Ramón Martínez López foi un referente do galeguismo e un boirense que debe ser recordado e homenaxeado”, afirmou daquela o alcalde boirense, José Ramón Romero, durante o acto en recoñecemento no que tamén participou a filla de Martínez López, Maribel Martínez.
Ramón Martínez López, insigne filólogo e político galego, naceu en Boiro o 4 de abril de 1907 e faleceu en Pontevedra o 12 de setembro de 1989. Participou na creación en 1923 do Seminario de Estudos Galegos e en 1931 estivo entre os fundadores do Partido Galeguista. Logo da súa marcha a Arxentina co inicio da Guerra Civil, accedeu en 1940 ao departamento de Linguas Románicas da Universidade de Austin, en Texas, onde realizará o seu labor de pescuda e docencia ata a súa xubilación en 1971.
Os seus temas de investigación principais foron a literatura medieval en galego, e a el débense as edicións críticas modernas das Cantigas de Santa María, de Afonso X e da General Estoria, do mesmo autor. Traballou tamén outros eidos da poesía medieval e contemporánea española (Antonio Machado) e da literatura portuguesa (Teixeira de Pascoais, entre outros), e publicou distintos estudos e artigos sobre literatura galega, tanto en galego como en inglés.
