Este venres 25 de agosto a familia de Manuel Sarasquete, médico de Ribeira, confirmou o seu falecemento en Málaga, onde residía, logo de que fose ingresado no hospital por unha pneumonía e esta rematase por complicarse.
Manolo Sarasquete, nado en Ribeira o 13 de xaneiro de 1936, era unha persoa moi querida na súa cidade natal, na que exerceu de médico particular (especialidade de pediatría) durante décadas até que decidiu emigrar a Canarias e a Andalucía, comunidade esta última onde vivía dende hai anos e onde tamén exerceu como médico e vivía coas súas fillas, Noelia e María. Manolo, que tamén foi un importante artista pictórico e enxeñeiro autodidacta (chegou a deseñar sistemas avanzados para facilitar nos barcos a pesca de arrastre e facela máis segura e eficiente, entre outros enxeños), tivo consulta propia na rúa Rosalía de Castro de Ribeira e era fillo do empresario Agustín Sarasquete, responsábel da empresa de transportes do mesmo nome e dos vapores que levaban pasaxeiros a través da ría de Arousa até a Illa e até Vilagarcía, amais de ser o co-fundador dos Almacenes Sarasquete, situados na actual rúa de Galicia. Descanse en paz.
