A Xunta de Galicia incrementou en 30 millóns de euros, ata chegar a 66,4 millóns, os fondos destinados á actual convocatoria de axudas para actuacións de rehabilitación enerxética en edificios de tipo residencial. Isto, segundo confirmou o Goberno galego, implica practicamente triplicar o orzamento destinado a esta mesma liña de incentivos o ano pasado, a de 2022, que se saldou (na súa primeira convocatoria) cunha execución do 100% e unha destacada demanda. Todo apunta a que esta importante repercusión marcará tamén o desenvolvemento desta nova orde axudas, xa que dende a apertura do prazo das mesmas (o pasado 16 de xuño) o Instituto Galego da Vivenda e Solo (o IGVS da Vicepresidencia Segunda e Consellería de Medio Ambiente, Territorio e Vivenda) xa superou as 650 solicitudes.
Coa ampliación orzamentaria autorizada, a Xunta busca responder á altísima demanda que está espertando esta segunda convocatoria do programa, destinando a reforzar as axudas para rehabilitar edificios o groso do diñeiro que ten que recibir Galicia no marco do terceiro reparto de fondos europeos para programas de mellora da eficiencia enerxética no eido residencial.
En concreto, o programa a nivel de edificio está destinado a apoiar a particulares, comunidades de veciños ou cooperativas propietarias de inmobles construídos antes do ano 2000 na execución de diferentes actuacións sobre a envolvente de edificios e construcións unifamiliares (como a renovación de fachadas e cubertas), así como á substitución de equipos de calefacción e auga quente por outros que non empreguen enerxía fósil para lograr reducir os consumos en, como mínimo, un 30%.
A subvención a percibir poderá chegar ata os 26.750 euros se se trata dunha vivenda unifamiliar e ata os 23.500 euros se esta forma parte dun edificio colectivo residencial. A contía, en todo caso, dependerá do aforro enerxético acadado, do tipo de inmoble e dos ingresos do solicitante, de xeito que ante determinadas situacións de vulnerabilidade poderase cubrir incluso o 100% do custo das obras.
Execución total en 2022
O ano pasado, a primeira convocatoria desta liña de subvencións saldouse coa execución do 100% dos 22,8 millóns de euros dispoñibles, fondos que contribuíron a mellorar a eficiencia de 2.334 vivendas en toda Galicia. O obxectivo do IGVS é poder chegar a financiar actuacións que incidan na eficiencia de arredor de 6.800 vivendas. Estímase que facilitarase a rehabilitación enerxética de case tres veces máis fogares galegos que no marco da primeira convocatoria.
A Xunta lembra que o programa a nivel de edificio non é o único convocado pola Xunta este ano co fin de axudar a reducir os consumos e as emisións do parque residencial galego. O 15 de xuño publicáronse outras dúas liñas de subvencións: para actuacións de mellora da eficiencia enerxética en vivendas e para a elaboración do libro do edificio e redacción de proxectos de rehabilitación, ambas con prazo aberto.
En total, os propietarios de vivendas e edificios residenciais teñen á súa disposición máis de 73 millóns de euros en axudas a través de tres tipos de programas (edificio, vivenda e libro do edificio) dirixidos a financiar obras e reformas que melloren a eficiencia enerxética dos seus fogares. Un orzamento que permitirá intervir sobre un total de 15.800 vivendas galegas.
