Un veciño de Boiro foi detido pola Garda Civil por presuntamente roubar o interior dun vehículo e cometer 13 furtos en praias e establecementos de hostalería do seu municipio e de Rianxo. Os delitos producíronse en xullo e agosto deste ano producindo, segundo describen desde o Instituto Armado “unha gran alarma social”.
O acusado está a ser investigado por aparentemente subtraer obxectos persoais como chaves de coches e de apartamentos, entre outras cuestións, aos usuarios das praias. A maioría dos afectados non residían en Galicia polo que os furtos supuxéronlles “grandes trastornos”. Durante a investigación a Garda Civil habería pescudado que o home realizaba furtos “ao descoido” facéndose cos bolsos dos bañistas mentres estaban na auga.
A maiores das súas actuacións no areal, o investigado tamén roubou no interior dun vehículo en Boiro. Unha operación que lle supuxo un ingreso de 1.500 euros, aos que deben sumarse os 54 das praias do municipio. Entre as pertenzas roubadas había cinco teléfonos e chaves de vehículos e vivendas.
O home, que estaba a ser investigado pola Garda Civil, chegou a ser pillado in fraganti. O detido foi posto ao dispor do Xulgado de Instrución de garda de Ribeira, decretando a Autoridade Xudicial o seu ingreso en Centro Penal sen fianza.
