O Concello de Rianxo quere mellorar o servizo dos centros docentes do municipio, poñer a punto as instalacións dos mesmos (facendo fincapé na sustentabilidade e nas facilidades de uso) e atender ás necesidades das comunidades educativas. Por esta razón o alcalde Julián Bustelo solicitou ao conselleiro de Educación, Román Rodríguez, unha xuntanza de traballo para trasladarlle estas demandas.
O obxectivo é “impulsar a organización dun plan de actuación para abordar as reclamacións da comunidade educativa rianxeira”, as cales pasan, en particular, “por dar continuidade ás obras iniciadas nalgún dos centros con vistas a optimizar a eficiencia enerxética e garantir a accesibilidade”. Ademais, o alcalde sinala que se “debe dar cunha solución conxunta á falta de prazas na escola infantil, buscando que ningunha familia quede fóra o curso vindeiro”.
