A conselleira de Medio Ambiente, Ángeles Vázquez, estivo este venres 14 de xullo en Porto do Son, onde visitou a parroquia de Queiruga na compaña do alcalde Luis Oujo e departiu cunha ducia de veciños da localidade que levan tempo reclamando a conexión das súas casas á rede de saneamento que dá servizo ao municipio para non ter que depender de pozos negros particulares para xestionar as súas augas residuais.
Durante a súa estadía no Son, a conselleira dixo que a nova Lei de ordenación e xestión integrada do litoral de Galicia “garante e facilita o acceso a servizos básicos e esenciais, como pode ser o saneamento, ás poboacións asentadas en núcleos costeiros tradicionais e que, ata o de agora, vían restrinxido este dereito pola interpretación restritiva da Lei de costas por parte do Estado”.
Tras lembrar que a lei foi publicada onte no Diario Oficial de Galicia e entrará en vigor o 2 de agosto, a vicepresidente segunda explicou que “nesta nova norma a Xunta marcou unha serie de usos estratéxicos e prioritarios con encaixe no dominio público marítimo-terrestre e tamén en zona de servidume”, categoría na que enmarcou, precisamente, os servizos de saneamento e de auga para consumo nos núcleos tradicionais costeiros “xa que resultan indispensábeis para garantir a calidade de vida da veciñanza”.
Vázquez engadiu que nos últimos anos son “múltiples os casos ao longo de toda a costa galega nos que as actuacións necesarias para garantir este tipo de servizos se atopan coas trabas de Costas do Estado”.
Neste sentido, explicou que “o Goberno central, a partir dunha interpretación excesivamente restritiva, sen ningunha lóxica e non amparada en ningún estudo científico, acaba opoñéndose de xeito reiterado a este tipo de actuacións co argumento de que hai que buscar outra localización”. E engadiu: “Galicia non vai vivir de costas ao mar, Galicia vive fronte ao mar”.
